DIGITAL NATION" СУРГАЛТАД 270 ГАРУЙ МЭРГЭЖИЛТЭН ХАМРАГДЛАА /2025.08.28/

Төвийн бүсийн Мэдээлэл зүйн багш нар, Мэдээллийн технологийн мэргэжилтнүүд Дархан-Уул аймагт зохион байгуулагдаж буй чадавхжуулах сургалтад хамрагдаж байна.

Тус сургалт нь Монгол Улсын Засгийн газар, Цахим хөгжил, инновац, харилцаа холбооны яамнаас дэвшүүлж буй “Digital first" бодлоготой уялдуулан "Дарханчууд залилуулахгүй" аяны хүрээнд зохион байгуулж байгаа олон талт ажлын нэг юм.

Нээлтэд аймгийн ИТХ-ын болон ГХУСАЗСЗ-ийн дарга А.Янжмаа, Төрийн цахим үйлчилгээний зохицуулалтын газрын аймаг хариуцсан хэлтсийн дарга Б.Дөлгөөн, Систем нэгтгэлийн хэлтсийн дарга Ж.Бямбадорж болон Дархан-Уул, Сэлэнгэ, Төв аймаг дахь Төрийн цахим үйлчилгээний хэлтсийн дарга нар оролцлоо.

Мөн аймгийн ИТХ-ын Нийгэм, цахим бодлогын хорооны гишүүд /төлөөлөгч Д.Түмэн-Өлзий, Х.Батбаяр, Б.Оюунчимэг, Э.Азжаргал, Г.Отгонбаатар/ оролцож бодлого боловсруулах, шийдвэр гаргах түвшинд хэрхэн ажиллах талаар мэргэжилтнүүдтэй харилцан санал солилцлоо.

Сургалт зохион байгуулагчид болон мэргэжилтнүүд хиймэл оюун ухаан, кибер аюулгүй байдлын талаарх эрх зүйн бичиг баримтыг боловсронгуй болгох, мэргэшсэн инженер, шинжээчдыг бэлтгэх, иргэдийн мэдлэгийг дээшлүүлэх, сэрэмжлүүлэх мэдээ, мэдээлэл сурталчилгааг тогтмолжуулах нь зүйтэй гэж санал нэгдэж байна.

Техник, технологийн үсрэнгүй хөгжлийг даган үүсэж байгаа сөрөг нөхцөл байдал, эрсдлийг бууруулах, ард иргэдийг мэдээллээр хангах чадавхжуулахад мэргэжилтнүүдийн оролцоо манлайлал, санал санаачлага, үлгэрлэл ихээхэн чухлыг аймгийн ГХУСАЗСЗ-ийн даргын зүгээс онцолж, хил хязгааргүй хамтран ажиллах уриалгыг дэвшүүллээ.